蜜月之旅 DAY 6 ~ 走入宮崎駿既動畫世界－小鹿

今日竟然天朗氣清,無落雨呀~ 連續兩日都好天, YEAH!!!!

今日既目的地係三鷹之森美術館~

由新宿坐"中央線"到三鷹站後,我地都搜索左一陣,先見到博物館專用既貓巴士站~

架貓巴士好細架,得幾個座位,其餘都係企位~ 車程大概5分鐘左右 ~

到左喇~ 到左喇~ 嘩嘩嘩~ 好靚呀,座 Building 好似宮崎駿動畫入面D建築物呀~~

宮崎駿博物館的官方網站

入左去博物館就唔可以影相架喇~~ 回憶只可在心中....

((希望善忘既鹿幾十年後都仲記得入面所有野啦~~))

入場時每人都會收到一張用動畫彩色底片造既飛留念,不過我同老公都唔知張飛上面係邊套動畫, hee ~

我地一入去就去睇館入面既免費電影,我地o個場係龍貓個妹妹同貓巴士既番外篇~~
((我最想睇都係呢套咋~))

呢套番外篇出現左好多龍貓入面無既角色架~~ 有三對腳既小貓巴士啦, 貓火車啦,雙層貓巴士啦,仲有貓飛船爺爺啦,同埋一大群龍貓~~

好好睇呀~ 雖然唔識聽日文,但淨睇畫面,都已經明個故仔講乜架喇~
同埋一聽到龍貓既音樂,就好感動~~

跟住就參觀喇~

地下呢層有好多分鏡既模型,利用高速旋轉,加上閃光製造視覺殘像,D模型就好似識郁咁~

動畫既原理就係咁~~

我形容得唔好呢... 但,只要你親身去睇一次,就會明白~~真係好厲害, 好amazing~

樓上就係動畫工作室...真係會勁讚嘆~~ 台上一分鐘,台下十年工啊~

仲有貓巴士天地,但只准小朋友入去玩,入面仲放左好多霉炭屎鬼架....

((咁唔公平架,我想摸下隻貓巴士咋喎~~))

天台就有一個天空之城既機械人同飛行石,好多人擁住上去影相呢~

個太陽又勁曬,我地都好求其咁影到此一遊相就算~

之後就逛左入面既紀念品店,D野既選擇同精美程度都令我有少少失望呀,龍貓既野又唔多,
所以淨係買左個天空之城機械人紙鎮送比老板,其餘乜都無買~

雖然行晒成個博物館都唔需要好耐,買飛又麻煩,入面又唔比影相,
但,我覺得去一次係值得架,只要你唔抗拒動畫~

你參觀完,可以感受到做一套動畫,絕對係一件唔簡單既事,幕後用左既心血真係唔少~